Акафист преподобному Николе Святоше, князю Черниговскому

Молитвы предначинательные

Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.

Сла́ва Тебе́, Бо́же наш, сла́ва Тебе́.

Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.

Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй, трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Го́споди, поми́луй, 12,

Прииди́те, поклони́мся Царе́ви на́шему Бо́гу.

Прииди́те, поклони́мся и припаде́м Христу́, Царе́ви на́шему Бо́гу.

Прииди́те, поклони́мся и припаде́м Самому́ Христу́, Царе́ви и Бо́гу на́шему.

Псалом 50:

Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.

Кондак 1

Избранному от рода княжескаго и венцем от Царя Царствующих увенчанному, преподобному Николе песнь днесь воспети дерзаем и, величающе сего подвиги и смирение, со умилением воспеваем: Радуйся, отче наш Николо, светом святости нас присно озаряющий.

Икос 1

Ангелом сомолитвенниче и собору святых сопричастниче, преподобне отче наш Николо, волею отчий престол оставивший и ризы равноангельнаго жития приявый, днесь похвалу ти принести дерзаем и, на молитвы твоя уповающее, умильно взываем:

Радуйся, отче наш всеблаженный;

радуйся, наставниче наш премудрый.

Радуйся, ангелом сомолитвенниче;

радуйся, собору святых сопричастниче.

Радуйся, яко молитвами твоими исцеления нам подаются;

радуйся, яко предстательством твоим благодать изливается.

Радуйся, Печерския обители украшение;

радуйся, земли нашея утверждение.

Радуйся, отче наш Николо, светом святости нас присно озаряющий.

Кондак 2

Видяще благочестивое житие родителей твоих, потщался еси сих добродетелем подражати, и совокупил еси благородству благочестие, Богу непрестанно молитву вознося: Аллилуиа.

Икос 2

Разум имуще благодатию Божией просвещенный, отринул еси суемудрие века сего и отвратился еси селений грешничих, возлюбил же еси благолепие дома Божия и место селение славы Его. Сего ради приими от нас похвалы сия:

Радуйся, святое прозябение корене благочестиваго;

радуйся, дивный цвете вертограда благоуханнаго.

Радуйся, грозде всесладкий Лозы Благоплодныя;

радуйся, праведных родителей отрасль пречестная.

Радуйся, от юности во благочестии воспитанный;

радуйся, на путь доброделания измлада наставленный.

Радуйся, всех нас ко спасению наставляющий;

радуйся, от стезей греха нас всемощно отвращающий.

Радуйся, отче наш Николо, светом святости нас присно озаряющий.

Кондак 3

Силою Божественною укрепляем, возмогл еси, преподобне, козни лукаваго попрати и добродетельми украситися всесветло, Господу присно работая и Ему усердно взывающе: Аллилуиа.

Икос 3

Имуще всяческая благая мирская, отринул еси вся, Единаго Благаго возлюбивше и Сему служити восхотевши. Темже устремился еси во дворы Дому Господня, в селение славы Его, и на горах печерских возсиял еси светом добродетелей, сего ради пении сицевыми ублажаешися:

Радуйся, мира суету и страстей течение отринувый;

радуйся, чистоту и богомыслие паче всяческих возлюбивый.

Радуйся, всесильною Десницею Господней укрепляемый;

радуйся, светом лица Божия выну озаряемый.

Радуйся, благодатию Господнею осененный;

радуйся, Божиих дарований исполненный.

Радуйся, светильниче, огнем добродетели возженный;

радуйся, подвигами благочестия преукрашенный.

Радуйся, отче наш Николо, светом святости нас присно озаряющий.

Кондак 4

Бурю страстей утишил еси отче, молитвою твоею всемощною и потопил еси, яко египтянины, искушения и соблазны в море слез твоих, егда предстояще пред Лицем Господним о всем мире ходатайствовал еси и непрестанно взывал еси Господу: Аллилуиа.

Икос 4

Слышати восхотел еси глаголы ангельския неизреченныя, ихже не лесть суть языком человеческим глаголати, удалился еси многомятежнаго мира и Господу прилепился еси, ангельскаго образа причаститися сподобившеся, сего ради песньми сицевыми тя почитаем:

Радуйся, ангельским житием просиявый;

радуйся, воздержанием страсти угасивый.

Радуйся, греховныя стремления подвиги своими поправый;

радуйся, на высоту добродетелей возшедый.

Радуйся, всякое искушение преоборовый;

радуйся, вся советы лукаваго молитвами твоими разоривый.

Радуйся, светом Небесным нас просвещающий;

радуйся, огня геенскаго нас избавляющий.

Радуйся, отче наш Николо, светом святости нас присно озаряющий.

Кондак 5

Божественным светом несозданным осияна бысть душа твоя, отче всеблаженне, егда возшел еси на высокую гору молитвы и на скрижалях сердца Твоего начертал еси словеса Закона Божия, егоже блюсти научал еси всех, да купно с тобою воспоим и прославим Господа, зовуще: Аллилуиа.

Икос 5

Видяще смирение твое и воспевающе подвиги твоя, отче всеблаженне, яже восприял еси ради служения безропотнаго братии Печерстей, ублажаем Господа, силу Свою в немощи твоей Совершившаго и сицевыми песньми похваляем тя:

Радуйся, безропотное служение братии на себе восприявый;

радуйся, образ послушания в себе самом показавый.

Радуйся, труды и подвиги своими плоть изнуривый.

Радуйся, течением слез источники страстей уставивый.

Радуйся, бронею правды облеченый.

Радуйся, венцем целомудрия увенчаннный.

Радуйся, в ризу смирения себе одеявый;

радуйся, порфирою добровольныя нищеты душу свою украсивый.

Радуйся, отче наш Николо, светом святости нас присно озаряющий.

Кондак 6

Проповедуют холми печерстии память подвигов твоих, преподобне, сиими бо душу свою украсивши яко одеждею всекрасною, возшел еси на брак Агнчий во обители Небеснии, идеже купно со всеми святыми песнь приносиши Богу: Аллилуиа.

Икос 6

Возсиял еси светом святости твоея, яко светильник всесветлый, не под спудом, но на высокой свещнице Лавры Печерския возженный, да просветиши сердца и умы всех, во еже Бога славословити и тя, угодника Его вседивнаго воспевати:

Радуйся, крест жития равноангельнаго от Господа приявый;

радуйся, всему миру образ доброделания явивый.

Радуйся, ко благочестию нас наставляющий;

радуйся, от всякия напасти нас избавляющий.

Радуйся, в молитве к Богу предстоятелю;

радуйся, Небесных благ всеславный раздаятелю.

Радуйся, обеты иноческия неврежеднно сохранивый;

радуйся, сладость молитвы в житии своем вкусивый.

Радуйся, отче наш Николо, светом святости нас присно озаряющий.

Кондак 7

Хотяще тя Человеколюбец Господь яко всесветлое светило миру явити, не под спудом, но на свещнице высокой постави, да на подвиги твоя взирающе, научаемся добродетельному житию подражати, греха же и скверны всякия отвращатися, Господу выну работая и Сему непрестанно молитву возносяще: Аллилуиа.

Икос 7

Новаго Соломона премудраго зрим тя, отче преподобне, о порфире и скиптре яко о суете сует мудрствующаго, и Единаго Господа яко сокровище многоценное в сердцем своем имети потщавщагося, сего ради приими похвалы сицевыя:

Радуйся, Божественныя мудрости взыскавый;

радуйся, небеснаго знания возжелавый.

Радуйся, суемудрие отринувый;

радуйся, богомудрие возлюбивый.

Радуйся, Божиих дарований исполненный;

радуйся, благодатию Господнею осененный.

Радуйся, блистанием Истины осиянный,

Радуйся, огнем Божественным всеразженнный.

Радуйся, отче наш Николо, светом святости нас присно озаряющий.

Кондак 8

Странен мудрецам века сего явися подвиг твой, преподобне, како отеческое достояние отринувше, возжелал еси истиннаго сокровища - Христа Сына Божия, и Сего обретше, всякое земное стяжание во уметы вменил еси, Господа воспевая: Аллилуиа.

Икос 8

Весь благодатию Божией облеклся еси, яко светлою ризою и боготканною, отче наш преподобне, темже и власяница Твоя явися всем источник исцелений и чудес, сродником твоим ниспосылаемых. Сии поминающе, тя пением похвальным ублажаем:

Радуйся, молитвы кадило благоуханное;

радуйся, стено ограждения нерушимая;

Радуйтеся, чудес Христовых пучино неизмеримая,

Радуйтеся, милостей Господних реко неоскудная;

Радуйтеся, благодати кладезю неисчерпаемый,

Радуйтеся, даров Божиих источниче неистощимый.

Радуйся, непрестанно о всех молитвы приносящий;

радуйся, о память твою совершающих присно ходатайствующий.

Радуйся, отче наш Николо, светом святости нас присно озаряющий.

Кондак 9

Всякия избави нас напасти и скорби, отче наш богомудре Николо, ты бо присно предстоиши Престолу Божию и молишися о всех нас, память твою светло совершающих и тя в помощь и заступление призывающих, непрестанно Богу взывающе: Аллилуиа.

Икос 9

Витийствовал всеизрядно не усты, но делы своими, подвиги бо твоими паче всякаго наставника научил еси и храниением языка твоего паче всякаго многословнаго проповедника наставлял еси, во еже бегати суеты мира, Господу же присно сужити, темже тя яко учителя доброделей премудраго, воспеваем сице:

Радуйся, Церкве Христовыя столпе непоколебимый;

радуйся, Православия светильниче неугасимый.

Радуйся, наставниче наш благодатный;

радуйся, отче милостивый и кроткий.

Радуйся, души наша Словом Божиим просветивый;

радуйся, сердца наша питием благочестия напоивый.

Радуйся, светильниче, огнем добродетели возженный;

радуйся, благодатию Христовою преукрашенный.

Радуйся, отче наш Николо, светом святости нас присно озаряющий.

Кондак 10

Спасение испроси всем и грехов разрешение, и болезней исцеление, и скорбей ослабу подаждь нам, отче преподобне, память твою верою совершающим, и о тебе пение Богу благодарственное приносящим: Аллилуиа.

Икос 10

Стена искушений обстоит нас, бед же и скорбей всяческих и напастей нашествие ополчается, ты же, отче святый, молитвами твоими всякое злоухищрение вражие далече отжени от нас, память твою сице воспевающих:

Радуйся, молитвою твоею нас укрепляющий;

радуйся, предстательством твоим от бед нас избавляющий.

Радуйся, любовию своею всех нас обымающий;

радуйся, никого же скорбящим оставляющий;

радуйся, врачу благодатный, телесем нашым здравие подающий;

радуйся, душам нашым спасение исходатайствующий.

Радуйся, огнем благодати сердца верных воспламеняющий;

радуйся, пламень злобы адския тайнодейственно угащающий.

Радуйся, отче наш Николо, светом святости нас присно озаряющий.

Кондак 11

Пения наша похвальная и гласы молебныя приими, отче наш Николо, и предстательством твоим невредимы град и землю нашу сохрани, и молитвами твоими и нас чада Света быти сподоби, да с тобою песнь всерадостную поем: Аллилуиа.

Икос 11

Света сын и наследниче вечных благ явился еси, отче преподобне, подвигом бо добрым подвизался еси, течение скончал еси, веру соблюл еси, темже и сокровище нетленное благодати явился еси и ко Христу присно наставляеши нас, ти вопиющих:

Радуйся, Светом Невечерним озаренный;

радуйся, Славою Божиею просвещенный.

Радуйся, трапезою Небесною насыщенный;

радуйся, питием безсмертия напоенный.

Радуйся, Царствия Христова сонаследниче;

радуйся, вечныя Пасхи сопричастниче.

Радуйся, селений небесных преславно достигнувый;

радуйся, в чертозех пресветлых водворивыйся.

Радуйся, отче наш Николо, светом святости нас присно озаряющий.

Кондак 12

Благодати Божией источник неоскудеваемый явишася всем верным мощи твоя честныя, отче наш Николо, изливают бо токи исцелений и помощь Небесную всем, с верою к тебе прибегающим и тобою Господу молитву приносящим: Аллилуиа.

Икос 12

Поюще Бога, Дивнаго во святых Своих, похвалы всяческая приносим ти, отче наш Николо, молитвенниче о нас усердный и заступниче наш всечудный, и единым сердцем величаем тя, глаголюще:

Радуйся, причастниче вечныя радости;

радуйся, приятелище Божественныя сладости.

Радуйся, правды дивное благоухание;

радуйся, святости чудное сияние.

Радуйся, преславное верных величание;

радуйся, православных крепкое упование;

Радуйся, равноангельское житие явивый;

радуйся, подвиги и чудесы своими землю нашу просветивый.

Радуйся, отче наш Николо, светом святости нас присно озаряющий.

Кондак 13

О, предивный угодниче Христов, преподобне отче наш Николо, приими немощное пение сие от любви нашея возсылаемое ти, и моли Господа и Владыку всяческих избавити нас душевреднаго прилога вражиего, да спасение вечное улучивше, песнь с тобою боголепно воспоим: Аллилуиа.

Сей конда́к глаго́лется три́жды. И па́ки чте́тся и́кос 1-й, и конда́к 1-й.

Молитва

О, блаженне преподобне отче наш Николо, отеческое достояние и престол града Чернигова ради Господа оставивый и всеблагое иго жития иноческаго на рамена своя подъявый, подвиги своими обитель Печерскую светло украсивый и яко многоценное сокровище чудотворныя своя мощи нам преславно оставивый! Во дни земнаго жития твоего явил еси образ благочестия и мужества, терпения и любви, милосердия и кротости. По отшествии же своем многими чудесы утешил еси всех, притекающих к тебе и помощи твоея умильно просящих, даруя болящим исцеление, скорбящим радование, утесняемым поможение, всем же скорое и благодатное предстательство пред Престолом Божиим.

Темже и ныне, к тебе прибегающе и пред святою твоею иконою молебныя гласы приносящее, со упованием просим: всеблаженне и милостиве отче наш Николо, ради благодетельного и благочестиваго жития твоего Святошею нареченный, теплыми твоими молитвами исходатайствуй от Господа вся благопотребная, болящих и недугами утесняемых уврачуй, в союзе супружестем подвиг свой совершающим любовь укрепи и миром и благоденствием дни их украси, иночествующих плодами добродетелей пресветло увенчай, отроком, науки постигающим, разум светом Премудрости Божия просвети, во теме греховней сущим вразумление и покаяние даруй, ересьми и расколами ослепленных ко спасительной стези истинныя веры направи, в пути сущих настави, и всех нас во благочестии и исполнении заповеденй утверди, да милостию Божиею и предстательством твоим сподобимся неосужденно славословить Отца и Сына и Святого Духа во веки. Аминь.